Datum:

Opskrif:

Gedagte: Gedagte vir die week: “God gee die wind” Ons praat die afgelope maand baie oor ons leuse: “Span die seile – God gee die wind.” Miskien is dit maklik om by die eerste deel vas te haak: span die seile. Ons wil iets dóén. Ons wil beplan, organiseer, bou en werk. En dit is reg—die Here roep ons om gehoorsaam en betrokke te wees. Maar die tweede deel is eintlik die sleutel: God gee die wind. Dink net vinnig aan ’n seilboot. Jy kan alles reg doen—die seile kan mooi opgeslaan wees, die roete kan beplan wees, die span kan gereed wees—maar sonder wind gebeur daar eenvoudig niks nie. Die boot bly net daar. Psalm 104 herinner ons: Die wind is nie net ’n natuurkrag nie—dit is onder God se beheer. Hy “ry op die vleuels van die wind.” Met ander woorde: selfs dit wat ons nie kan sien of beheer nie, is in Sy hand. Dis ook hoe God se Gees werk. Ons sien nie die Gees self nie, maar ons sien wat Hy doen: harte wat verander, hoop wat terugkom, mense wat weer begin glo, gemeentes wat nuwe lewe kry. Dit beteken vir ons: Ons taak is nie om die wind te maak nie— ons taak is om die seile te span. Om beskikbaar te wees. Om te gehoorsaam. Om te bid. Om te luister. En dan… vertrou ons dat God die res sal doen. Miskien is dit ’n goeie vraag vir hierdie week: Is my seile gespan—en is ek oop vir die wind van God se Gees? Mag ons as gemeente nie net besig wees nie, maar werklik beweeg - gedra deur die wind wat net God kan gee.